Eze 43 | NdeIBE | STEP | Emva kwalokho umuntu lowo wangisa esangweni elikhangele empumalanga,

Ezekiel 43

Inkazimulo KaJehova Ibuyela Ethempelini

1 Emva kwalokho umuntu lowo wangisa esangweni elikhangele empumalanga,

2 ngabona inkazimulo kaNkulunkulu ka-Israyeli isiza ivela empumalanga. Ilizwi lakhe lalinjengokuhamba kwamanzi ageleza ngesiqubu esikhulu, lelizwe laselikhazimula ngenkazimulo yakhe. 3 Umbono engawubonayo wawunjengombono engangiwubone lapho wayezediliza idolobho njalo wawunjengombono engangiwubone ngasemfuleni iKhebhari, ngathi mbo phansi ngobuso.

4 Inkazimulo kaJehova yangena ethempelini ngesango elikhangele empumalanga. 5 UMoya wangiphakamisa wangisa egumeni langaphakathi, njalo inkazimulo kaJehova yagcwala ethempelini.

6 Kwathi umuntu lowo emi phansi kwami, ngezwa omunye engikhulumisa engaphakathi kwethempeli. 7 Wathi, “Ndodana yomuntu, le yindawo yesihlalo sami sobukhosi lendawo yokunyathela ngezinyawo zami. Lapha yikho engizahlala khona phakathi kwama-Israyeli kuze kube laphakade. Indlu ka-Israyeli kayisayikulingcolisa futhi ibizo lami – bona loba amakhosi abo – ngobuwule babo langezithombe ezingaphiliyo zamakhosi abo ezindaweni zawo eziphakemeyo. 8 Lapho babeka iminyango yabo phansi komnyango wami lemigubazi yabo eceleni kwemigubazi yami, kulomduli nje kuphela phakathi kwami labo, bangcolisa ibizo lami ngezenzo zabo ezinengekayo. Ngakho ngabaqeda ekuthukutheleni kwami. 9 Khathesi-ke kabasusele kude lami ubuwule babo kanye lezithombe zamakhosi abo ezingaphiliyo, njalo ngizahlala phakathi kwabo kuze kube laphakade.

10 “Ndodana yomuntu, chazela abantu bako-Israyeli ngethempeli ukuze bayangeke ngezono zabo. Wothi kabacabange ngosekumiselwe ukwenziwa, 11 njalo uma belenhloni ngalokhu konke abakwenzayo, bazise ngesifanekiso sethempeli – ukuma kwalo, izindawo zalo zokuphuma lezokungena – isifanekiso salo sonke lezimiso zalo zonke kanye lemithetho. Bhala lokhu phansi phambi kwabo ukuze bathembeke kuso isifanekiso salo njalo balandele zonke izimiso zalo.

12 “Nanku umthetho wethempeli: Wonke ummango oseduze phezu kwentaba uzakuba ngcwele kakhulu. Lowo yiwo umthetho wethempeli.

I-Alithare

13 “Lezi yizilinganiso ze-alithare ngezingalo, ingalo kuyingalo lobubanzi besandla: Isidindi salo sasiyingalo eyodwa ukuphakama kwaso lengalo eyodwa ububanzi, silomqolo ongangobubanzi besandla emphethweni waso. Njalo nampu ubude be-alithare ukuphakama kwalo: 14 Kusukela esidindini phansi kusiya elitsheni elingaphansi lizingalo ezimbili ukuphakama lezingalo ezimbili ububanzi, njalo kusukela elitsheni elincane kusiya elitsheni elikhulu lizingalo ezine ukuphakama lezingalo eyodwa ububanzi. 15 Iziko le-alithare lizingalo ezine ukuphakama njalo izimpondo ezine zikhokhekele phezulu zisuka eziko. 16 Iziko lealithare liyalingana amacele wonke, izingalo ezilitshumi lambili ubude lezingalo ezilitshumi lambili ububanzi. 17 Uhlangothi lwangaphezulu lalo luyalingana macele wonke, izingalo ezilitshumi lane ubude lobubanzi lulomphetho oyingxenye yengalo lesidindi esiyingalo eyodwa inxa zonke. Izinyathelo ze-alithare zikhangele empumalanga.”

18 Wasesithi kimi, “Ndodana yomuntu, nanku okutshiwo nguJehova Wobukhosi: Le izakuba yimithetho yokunikela iminikelo yokutshiswa lokuchela igazi phezu kwe-alithare lapho selakhiwe: 19 Kumele unikele inkunzi eseseliguqa njengomnikelo wesono kubaphristi, abangabaLevi, abendlu kaZadoki abasondela eduze ukuba bakhonze phambi kwami, kutsho uJehova Wobukhosi. 20 Kumele uthathe elinye igazi ulifake ezimpondweni ezine ze-alithare lasemagumbini amane elitshe langaphezulu lasemphethweni inxa zonke, ngokunjalo uhlambulule i-alithare njalo ulenzele inhlawulelo. 21 Kumele uthathe inkunzi yomnikelo wesono uyitshisele endaweni ekhethiweyo yethempeli ngaphandle kwendawo engcwele.

22 “Ngosuku lwesibili kumele unikele imbuzi enduna engelasici ukuba ngumnikelo wesono, njalo le-alithare kumele lihlanjululwe njengokuhlanjululwa elakwenziwa ngenkunzi.

23 Lapho usuqedile ukulihlambulula, kumele unikele inkunzi eseseliguqa kanye lenqama evela emhlambini, kokubili kungelasici.

24 Kumele ukunikele phambi kukaJehova, njalo abaphristi kumele bavuvuzele itshwayi phezu kwakho bakunikele njengomnikelo wokutshiswa kuJehova.

25 “Okwezinsuku eziyisikhombisa kuzamele unikele imbuzi enduna nsuku zonke ukuba ngumnikelo wesono; njalo kumele unikele inkunzi eseseliguqa kanye lenqama evela emhlambini, kokubili kungelasici. 26 Okwezinsuku eziyisikhombisa bazakwenzela i-alithare inhlawulelo, balihlambulule, kanjalo balenze libe ngcwele. 27 Ekupheleni kwalezizinsuku, kusukela ngosuku lwesificamibili kusiya phambili, abaphristi kumele bethule iminikelo yakho yokutshiswa kanye leminikelo yobuzalwane e-alithareni. Lapho-ke ngizalamukela, kutsho uJehova Wobukhosi.”